Elm və Təhsil Nazirliyinin İqtisadiyyat İnstitutunda Ümummilli Lider Heydər Əliyevin anım gününə həsr edilmiş tədbir keçirilib.
Öncə Ulu Öndər Heydər Əliyevin əziz xatirəsi bir dəqiqəlik sükutla yad olunub.
Tədbiri giriş sözü ilə açan İqtisadiyyat İnstitutunun baş direktoru, professor Nazim Müzəffərli Ulu Öndər Heydər Əliyevin zəngin siyasi fəaliyyəti barədə danışıb. Qeyd edib ki, ölkəni xaosdan, böhrandan ustalıqla inkişaf yoluna çıxaran Heydər Əliyev Azərbaycan siyasətini, iqtisadiyyatını, mədəniyyətini yüksək səviyyəyə qaldırıb, dövlətçiliyi möhkəmləndirib. Müasir müstəqil Azərbaycan Heydər Əliyevin şah əsəridir. Prezident İlham Əliyev bu gün onun yolunu çox böyük uğurla davam etdirir, Qarabağ torpaqlarımızın erməni işğalından azad olunması da Heydər Əliyev kursunun davamının məntiqi nəticəsidir. Heydər Əliyev Azərbaycan xalqının yaddaşında qurucu və xilaskar dövlət xadimi kimi əbədi yaşayacaq.
AMEA-nın müxbir üzvü, professor Şahbaz Muradov Heydər Əliyevi Ümummilli Liderimiz, xalqımızın böyük oğlu, müasir Azərbaycanın memarı kimi xarakterizə edib. Qeyd edib ki, Azərbaycan xalqı xoşbəxtdir ki, o, XX əsrdə bəşəriyyətə Heydər Əliyev kimi dahi şəxsiyyət bəxş etmişdir. Respublikamızın ağır vəziyyətə düşdüyü 1993-cü ilin iyun ayında xalqımızın təkidli tələbi ilə Heydər Əliyevin siyasi hakimiyyətə yenidən qayıdışı Azərbaycanı və bütünlükdə xalqımızı fəlakətdən xilas etdi və dövlətimizin qurtuluşu başlandı. Ulu Öndərin gərgin əməyi, səriştəsi, böyük təşkilatçılıq qabiliyyəti, uzaqgörən daxili və xarici siyasəti nəticəsində Azərbaycanda ictimai-siyasi sabitlik bərpa edildi, yeni neft strategiyası işlənib hazırlandı, "Əsrin müqaviləsi" imzalandı və s. Ötən 22 il ərzində Prezident İlham Əliyev Heydər Əliyevin müəyyən etdiyi iqtisadi yüksəliş strategiyasını daha da inkişaf etdirərək Azərbaycanı dünyanın lider dövlətləri sırasına, onun iqtisadi inkişaf səviyyəsinin isə keyfiyyətcə yeni mərhələyə qədəm qoymasına nail olmuşdur. Bütün bunlara görə Azərbaycan xalqı Ulu Öndər Heydər Əliyevə hər zaman minnətdarlıq edir, ruhuna dualar oxuyur, Uca Tanrıdan rəhmət diləyir.
Digər çıxış edənlər də Ümummilli Lider Heydər Əliyevin tarixi irsi, milli ideologiyanın formalaşması və Azərbaycan dövlətçiliyinin inkişafındakı rolu, ölkənin sosial-iqtisadi inkişafında gördüyü işlər, elmi, mədəni və təhsil sahəsindəki yenilikləri, həmçinin xalqın rifahı üçün atdığı strateji addımlar haqqında danışıblar.
