AMEA-nın Gəncə Bölməsində akademik Ziyad Səmədzadənin “Azərbaycan iqtisadiyyatı 100 ildə” beşcildlik kitabının təqdimatı keçirilib. AMEA İqtisadiyyat İnstitutunun icraçı direktoru, iqtisad elmləri doktoru, professor Müşfiq Atakişiyevin də iştirak etdiyi, müəlliflə keçirilən görüşə elmi ictimaiyyətin nümayəndələri qatılıblar.
Tədbiri giriş sözü ilə AMEA Gəncə Bölməsinin sədri, akademik Fuad Əliyev açıb, Ziyad Səmədzadənin yeni kitabını Azərbaycan iqtisad elminə böyük töhfə kimi dəyərləndirib. O, həmçinin kitabın, bir ensiklopedik bilgilər mənbəyi kimi, iqtisadçı alimlər və gənc tədqiqatçılar üçün olduqca faydalı olduğuna diqqət çəkib.
Tədbirdə Azərbaycan Dövlət İqtisad Universitetinin kafedra müdiri, professor Məhiş Əhmədov, Azərbaycan Dövlət Aqrar Universitetinin kafedra müdiri, professor Məhərrəm Hüseynov, Azərbaycan Texnologiya Universitetinin marketinq kafedrasının dosenti Nüşabə Hacıyeva, 
AMEA-nın İqtisadiyyat İnstitutunun icraçı direktoru, professor Müşfiq Atakişiyev, Milli Aviasiya Akademiyası hüquqşünaslıq kafedrasının müdiri, professor İbrahim Quliyev, Gəncə Dövlət Universiteti Menecment və turizm işi kafedrasının profesor əvəzi Arzu Həsənov, Gəncə Dövlət Universitetinin Menecment və turizm işi kafedrasının müdiri Əli Allahverdiyev öz çıxışlarında “Azərbaycan iqtisadiyyatı 100 ildə” kitablar toplusunu ölkəmizin müasir iqtisadi həyatında öz izi olan akademik Ziyad Səmədzadənin bu yöndə yarım əsrlik fəaliyyət və fndamental araşdırmalarının məhsulu kimi dəyərləndiriblər. Qeyd olunub ki, Azərbaycan iqtisadiyyatının bir əsrlik dövrü barədə fundamental araşdırmaları və analitik yanaşmanı özündə əks etdirən bu nəşrdə respublikamızın hərtərəfli inkişaf modelinin elmi-nəzəri əsasları barədə dərin tədqiqi materiallara geniş yer verilib, ümumən 3 mindən çox səhifəni əhatə edən beşcildlikdə 1000-dən artıq mənbəyə istinad olunub, 400-dən artıq cədvəl və qrafik yer alıb.
Kitabın müəllifi, akademik Ziyad Səmədzadə çıxışında billdirib ki, beşcildliyin ərsəyə gəlməsinə əsas səbəb Ulu öndərimiz Heydər Əliyevin 1997-ci il yanvarın 17-də AMEA-nın akademikləri və müxbir üzvləri ilə görüşündə XX əsrdə və müstəqillik illərində Azərbaycanın inkişaf tarixinin yazılması ilə bağlı səsləndiyi fikirlər, təklif və tövsiyələr olub. Akademik kitabın ana xəttinin üç fundamental prinsipə - milli maraqlar, iqtisadi təhlil və cəmiyyətin inkişafına söykəndiyini vurğulayıb.
